ភ្នំពេញ៖ រដ្ឋមន្ត្រីក្រសួងសង្គមកិច្ច អតីតយុទ្ធជន និងស្ដារយុវនីតិសម្បទា លោក ជា សុមេធី បានអបអរសាទរចំពោះការដាក់បញ្ចូលរមណីយដ្ឋានរបស់គេជាសម្បត្តិបេតិកភណ្ឌពិភពលោកដោយអង្គការយូណេស្កូកាលពីថ្ងៃទី១៧ ខែកញ្ញា ឆ្នាំ២០២៣។

ក្នុងលិខិតអបអរសាទរចុះថ្ងៃទី១៨ ខែកញ្ញា ឆ្នាំ២០២៣ ផ្ញើជូននាយករដ្ឋមន្ត្រី សម្ដេចធិបតី ហ៊ុន ម៉ាណែត រដ្ឋមន្ត្រី ជា សុមេធី បានលើកឡើងថា ការដាក់បញ្ចូលរមណីយដ្ឋានប្រាសាទកោះកេរជាសម្បត្តិបេតិកភ័ណ្ឌពិភពលោកនេះ បង្ហាញពីការទទួលស្គាល់នូវតម្លៃលេចធ្លោជាសកលតាមរយៈលក្ខណៈវិនិច្ឆ័យទី២ និងទី៤ព្រមទាំង ទទួលស្គាល់ថា រមណីដ្ឋានប្រាសាទកោះកេរ រក្សាបាននូវភាព integrity និងAuthenticity ពេញលេញដែល ជាកំពូលស្នាដៃដ៏មហស្ចារ្យនៃស្ថាបត្យកម្មខ្មែរ និងមានតម្លៃសកលដ៏ចំណានស្ដែងចេញពីការខិតខំប្រឹងប្រែងរបស់ រាជរដ្ឋាភិបាលកម្ពុជាដែលដឹកនាំដោយអតីត នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចអគ្គមហាសេនាបតី តេជោ ហ៊ុន សែន ក្នុងការស្វះស្វែងនាំមកជូនប្រជាជនកម្ពុជា នូវសុខសន្តិភាព ការបង្រួបបង្រួមជាតិ ភាពសុខដុមរមនា ក៏ដូចជាការដឹកនាំកសាងអភិវឌ្ឍជាតិលើគ្រប់វិស័យ រួមទាំងការអភិរក្ស ការអភិវឌ្ឍសម្បត្តិវប្បធម៌ និងប្រពៃណី ដែលមិនអាចកាត់ថ្លៃបានរបស់ប្រជាជនកម្ពុជាយើងនិងជាមោទនភាពជាតិដ៏ធំធេងថ្មីមួយទៀត។

លោកបានចូលរួមអបអរសាទរនៅជោគជ័យនេះជាមួយនឹងនាយករដ្ឋមន្ត្រីសម្ដេចធិបតី ហ៊ុន ម៉ាណែត ផងដែរ។

គួរឱ្យដឹងដែរថា រមណីយដ្ឋានប្រាសាទកោះកេរ ត្រូវបានដាក់បញ្ចូលក្នុងបេតិកភណ្ឌវប្បធម៌ពិភពលោក នៃអង្គការយូណេស្កូ នៅក្នុងកិច្ចប្រជុំលើកទី៤៥ របស់គណៈកម្មាធិការបេតិកភណ្ឌពិភពលោក នៅទីក្រុងរីយ៉ាដ ប្រទេសអារ៉ាប៊ីសាអូឌីត នាថ្ងៃ១៧ កញ្ញា ២០២៣ វេលាម៉ោង ៤:៣០នាទីល្ងាច ម៉ោងនៅកម្ពុជា៕